Институтның массакүләм мәгълүмат чаралары белән хезмәттәшлегенең перспективалары

1 апрельдә  КФУның Филология һәм мәдәниятара багланышлар институтында “Татарстан Яңа гасыр” телерадиокомпаниясе генераль директоры, Россия телевидение академиясе академигы Илшат Юныс улы Әминов һәм «Татмедиа» акционерлык җәмгыяте генераль директоры Шамил Садыйков белән эшлекле очрашу узды.

Очрашуда    «Татмедиа» акционерлык җәмгыятенең социаль медиалар буенча директоры Алсу Җәүдәтовна  Исмәгыйлева,  “Яңа Гасыр» телерадиокомпаниясе” АҖ генераль директорының мәгълүмати тапшырулар буенча урынбасары Светлана Николаевна Кадырова, ТНВ башкарма директоры Лилия Кадыйрова, «Яңа Гасыр» телерадиокомпаниясенең мәгълүмати һәм иҗтимагый-сәяси тапшырулар дирекциясе баш мөхәррире Сәрия Хәбибуллина , “Ватаным Татарстан” газетасы баш мөхәррире Илназ Фәиз улы Фазуллин,  ТНВ алып баручысы,  мөгаллим Әдилә Радик кызы Сәфәрова катнаштылар.

Очрашу КФУ доценты, галимә Миләүшә Мөхәммәтҗан кызы Хәбетдинова тарафыннан татар телевидениесенең тарихына һәм бүгенгесенә багышланган фотокүргәзмә тәкъдим итүдән башланды.

Филология һәм мәдәниятара багланышлар институты директоры Рәдиф Рифкат улы Җамалетдинов кунакларны институтның “Татмедиа” акционерлык җәмгыяте белән берлектә тормышка ашырыла торган белем бирү программалары белән таныштырды. КФУның Габдулла Тукай исемендәге Милли мәдәният һәм мәгариф югары мәктәбе деканы Рамил Хәмит улы Мирзаһитов  югары уку йортындагы юнәлешләр һәм белгечлекләр белән таныштырды.

“2020 елдан Казан (Идел буе) федераль университетының Филология һәм мәдәниятара багланышлар институты базасында “Татмедиа” акционерлык җәмгыяте белән берлектә   «Гамәли филология: татар теле һәм әдәбияты, журналистика» программасы  эшләп килә”, — дип белдерде гомуми тел белеме һәм тюркология кафедрасы доценты, журналистлар әзерләү юнәлешенең кураторы Гүзәл Әмир кызы Нәбиуллина.  “Бу программа  төрле редакцияләрдә һәм медиаплатформаларда   эшли ала торган журналистлар әзерләүгә йөз тота. Бу юнәлештә укучы стулентларның “Татмедиа” карамагында булган төрле редакцияләрдә “Ялкын” һәм “Идел” журналларында, “Ватаным Татарстан”, “Шәһри Казан” газеталарында, “Татар-информ” мәгълүмат агентлыгы, “Интертат” электрон газетасында практика узу мөмкинлеге бар. Шулай ук без үзебезне “ТНВ”, “Шаян ТВ”, “Татарстан” телерадиокомпаниясендә дә сынап карый алабыз”, — диде.

2 нче курс студентлары Ихтыяр Кыямов, Айгөл Фаттахова һәм 3 нче курс студентлары Камилә Билалова, Кәрим Газизуллин, Илнар Камаев төрле медиапроектлар, редакцияләрдә практика узу мөмкинлекләре турында сөйләделәр, татар халкының күренекле әдипләрен һәм татар фәнендә тирән эз калдырган галимнәрне танытучы “Әдипләребез”, “Шәхес” проектларын тәкъдим иттеләр.

Очрашуда “Татарстан Яңа гасыр” телерадиокомпаниясе белән хезмәттәшлекне киңәйтү мөмкинлекләре каралды, уртак проектлар, киләчәккә планнар билгеләнде.

Высшая школа национального образования и культуры, фото: Гюнель Азизова.

Культура Международное сотрудничество 02.04.2025