Шигърият бәйрәме | ИФМК КФУ

Адрес для получения консультаций по приему:
г. Казань, ул. Татарстан д.2, кабинет 213

Телефон для получения консультаций по приему для абитуриентов:
8 (993) 410-05-44

Шигърият бәйрәме

Арча районы Яңа Кырлай авылында Габдулла Тукайның тууына 139 ел тулу уңаеннан, Шигърият бәйрәме үткәрелде

Айрылып китсәм дә синнән гомремең таңында мин,

И Казан арты! Сиңа кайттым сөеп тагын да мин.

(Г.Тукай)

25 апрель көнне, Арча районы Яңа Кырлай авылында Габдулла Тукайның тууына 139 ел тулу уңаеннан, Шигърият бәйрәме үткәрелде. Анда күренекле сәнгать әһелләре, Татарстан Язучылар берлеге рәисе Ркаил Зәйдулла җитәкчелегендә язучылар, галимнәр, шул исәптән, Филология һәм мәдәниятара багланышлар институтының Габдулла Тукай исемендәге Милли мәдәният һәм мәгариф югары мәктәбенең татар әдәбияты кафедрасы профессоры Л.И. Минһаҗева да катнашты.

Тантаналы чара Г.Тукай дәүләт әдәби-мемориаль музей комплексы каршындагы мәйданчыкта узды. Бәйрәм кунакларның чыгышы, Ш.Х.Биктемиров исемендәге Казан театр училищесы студентлары, Арча район Мәдәният йорты иҗат төркеме әзерләгән концерт номерлары белән үрелеп барды. Соңыннан шагыйрьнең музей комплексында урнашкан һәйкәленә чәчәкләр салынды.

Шигърият бәйрәменнән соң, Габдулла Тукайның туган авылы Кушлавычта очрашулар булды. Кушлавыч музеена сәяхәт, укучылар белән аралашу һәм Тукайның туган йорты нигезенә куелган бюстка чәчәкләр салу, шагыйрьнең әтисе Мөхәммәтгариф Мөхәммәтгалимовның каберен зиярәт итү һәм аның рухына дога уку – укучылар һәм кунаклар күңелендә якты истәлек булып калды.

Минһаҗева Ләйлә Ихсановна