Әхмәтшин Равил Кәлимулла улы: "Әлеге уку йортында белем алган студентлар тормышта югалып калмый!"

20 октябрь көнне Филология һәм мәдәниятара багланышлар институтында Татарстан Республикасының Россия Федерациясендәге вәкаләтле вәкиле Әхмәтшин Равил Кәлимулла улы белән очрашу узды.

Очрашуны институт директоры Җамалетдинов Рәдиф Рифкать улы ачып җибәрде.

• Әхмәтшин Равил Кәлимулла улы белән очрашу безнең институтның матур бер традициясенә әйләнде. Ул кызыклы тормыш юлы үткән шәхес, Татарстанның Әлмәт районында туып үскән, Казан  дәүләт университетының татар филологиясе бүлеген тәмамлаган, инде бик күп еллар Татарстанның Россия Федерациясендәге вәкаләтле вәкиле, югары дәрәҗәдәге дәүләт эшлеклесе. Сез һәрвакытта безгә булышасыз, кайгыртып торасыз, шуның өчен бик зур рәхмәтебезне белдерәбез,  – дип,  ул сүзне хөрмәтле кунакның үзенә бирде.

Равил Кәлимулла улы Мәскәү шәһәрендәге татарлар эшчәнлеге, Мәскәүдә Татарстан мәдәнияте көннәре хакында сөйләде. Тел белгечләренең, филологларның һәркайда хөрмәтле кеше булуларын ассызыклады, үзенең шәхси тормышыннан да мисаллар китерде. Очрашу ахырында студентлар кунакны сорауларга күмделәр, студент чактагы хатирәләре белән уртаклашуны үтенделәр. Бу урында Равил Кәлимулла улы үзенең остазларын сагынып искә алды:

• Мин гомерем буе үземнең остазларым Мөхәммәт Мәһдиев, Хатыйп Миңнегулов, Флера Сафиуллинага  рәхмәтле булдым. Аларның лекцияләре, кирәк чакта безгә ярдәм итүләре әле хәзер дә күңелдә, –диде ул хатирәләргә күмелеп.

Соңыннан кунагыбыз студентларны актив булырга, сәләтләрен үстерергә, бернигә дә карамыйча максатларына ирешергә өндәде. “Әлеге уку йортында белем алган студентлар беркайчан да тормышта югалып калмый!” – диде ул.

Халкыбызнең киләчәген кайгыртып, тел, гореф-гадәт, милли үзаңны саклау максатыннан Ватаныбызга хезмәт итүче шәхес белән күзгә-күз очрашу студентларыбызның күңелендә җылы хисләр генә калдырды.

Фото: Арина Зуева

Образование 09.10.2023